عمران خان نے اداروں کو دباو میں لانے کی کوشش کی،جاوید لطیف

لاہور(یواین پی)وفاقی وزیر جاوید لطیف نے عمران خان کو ملکی سلامتی کیلئے خطرہ قرار دے دیا۔ انہوں نے کہا کہ ان کا مقصد ملک میں فساد، اداروں اور معیشت کو کمزور کرنا ہے۔وفاقی وزیر جاوید لطیف نے نیوز کانفرنس کرتے ہوئے کہا کہ سابق وزیر اعظم کی باتیں ریاست کیلئے مفید نہیں، کسی کو ملک کا تشخص تباہ کرنے کی اجازت نہیں، متنازعہ شخص کو کسی اہم قومی عہدے پر نہیں آنا چاہیے، ادارے آئینی حدود میں رہ کر کام کرنے کا تہیہ کر چکے ہیں، عمران خان ملک میں فساد برپا کرنا چاہتے ہیں۔جاوید لطیف کا کہنا تھا کہ عمران خان نے اداروں کو دباو میں لانے کی کوشش کی، یہ ملک میں خانہ جنگی کی کوشش کر رہے ہیں، عمران خان 20 سال سے قومی اداروں کو نشانہ بنا رہے ہیں۔