قرآنی خطاطی امت مسلمہ کا قابل قدرورثہ ہے ڈپٹی کمشنر لیفٹیننٹ(ر)سہیل اشرف

فیصل آباد (یو این پی)ڈپٹی کمشنر لیفٹیننٹ(ر)سہیل اشرف نے کہا کہ قرآنی خطاطی امت مسلمہ کا قابل قدرورثہ ہے جس کے ذریعے نہ صرف خطاط حضرات کو اپنے فن کے اظہار اور روحانی تسکین کے مواقع حاصل ہوتے ہیں بلکہ قرآن پاک کی عظمت کو بھی اجاگر کرنے کا بہترین ذریعہ ہے۔انہوں نے یہ بات پنجاب آرٹس کونسل، انٹرنیشنل کیلیگرافی ایسوسی ایشن،پاکستان کیلیگراف آرٹسٹس گلڈ اور کیلیگرافرز ایسوسی ایشن اف پاکستان کے اشتراک سے منعقدہ لوح و قلم کے عنوان سے انٹرنیشنل کیلگرافی نمائش کے شرکاءخطاط حضرات میں سرٹیفیکیٹس وشیلڈز تقسیم کرتے ہوئے کہی۔ڈائریکٹر آرٹس کونسل زاہد اقبال اور دیگر افسران بھی موجودتھے۔ڈپٹی کمشنر نے آرٹ گیلری میں رکھے گئے فنپارے دیکھے اور ان میں گہری دلچسپی کا اظہار کرتے ہوئے انہیں تیار کرنیوالوں کے جذبہ کی تعریف اور ایونٹ کے انعقادکوسراہا۔انہوں نے کہا کہ خطاطی کے ایسے پروگرامز کی بدولت ابھرتے ہوئے خطاط کی حوصلہ افزائی کے علاوہ انہیں اپنے سینئرز کے کام کو دیکھ کر مزیدسیکھنے کے مواقع میسر آتے ہیں۔انہوں نے غیر ملکی خطاط حضرات کے فن کو بھی سراہا اور کہا کہ سکولوں وکالجوں کے طالب علموں کو بھی ایسے ایونٹس میں شریک کریں۔ڈائریکٹرنے بتایا کہ ترکی میں ہونے والی انٹرنیشنل نمائش میں انعام یافتہ اور معروف کیلیگرافی کے فن پاروں کو رکھا گیا ہے جبکہ خطاطین میں احمد فارس رزاق (ترکی)،داود بختاش (ترکی) ارسیکا (ترکی)،جواد خوران (ترکی)،کمال البہری (ترکی)، عثمان چیچک (ترکی)،شرین عبدالحلیم (ترکی)، محمد جابر (ترکی) اور پاکستان سے عرفان قریشی،خالد محمود صدیقی، محمد جمیل حسن، شوکت علی منہاس، عبد الرحمن، فیصل آباد ڈویژن سے حافظ انجم محمود (مرحوم) سعید ندرت، اعجاز یوسفی، گلزار احمد بٹ، رانا غضنفر علی، زبیر مغل، محسن رضا، محمد عارف، ضمیر احمد، محمد اجمل، محمد یحییٰ، قمر سلطان، سید سراج، اسلم ڈوگر، سیف اللہ، نوید اقبال، کاشف نذیر اور نثار احمد کے فنپارے رکھے گئے۔