ن لیگ کیخلاف سازشوں اور ہمیں گرانے میں عمران خان برابرکا حصہ تھے ، سعد رفیق

حسب عادت پی ٹی آئی حامیوں نے میر ی تقریر کے ایک جملے سے عمران خان کومعصوم ثابت کرنے کی کوشش کی، ذمہ داران میں سے کسی ایک کو مکھن سے بال کی مانند نکال کر تاریخ مسخ کرنے نہیں دی جائے گی ، رہنماء ن لیگ کی سماجی رابطے کی ویب سائٹ ایکس پر پوسٹ
لاہور(یواین پی)پاکستان مسلم لیگ ن کے سینئر رہنماءسعدرفیق کا کہنا ہے کہ ن لیگ کیخلاف سازشوں اور ہمیں گرانے میں بانی پی ٹی آئی عمران خان برابرکا حصہ تھے،حسب عادت پی ٹی آئی حامیوں نے میر ی تقریر کے ایک جملے سے عمران خان کومعصوم ثابت کرنے کی کوشش کی، سماجی رابطے کی ویب سائٹ ایکس (ٹوئیٹر)پر اپنی پوسٹ میں رہنماء ن لیگ نے کہا کہ اس بات کا پس منظر محض یہ ہے کہ پاکستان مسلم لیگ (ن) کو گرانے اور ہماری پکڑ دھکڑ کی تیاری2017ءسے شروع ہوئی تھی جس میں جنرل (ر) قمر جاوید باجوہ، جنرل (ر) فیض حمید، جسٹس ثاقب نثار اور ان کے ساتھی اس کھلواڑ کو اپنی ریاستی طاقت سے آگے بڑھا رھے تھے جب کہ بانی پی ٹی آئی عمران خان اس سازش کا حصہ اور اس سے فائدہ حاصل کرنے والوں میں سے تھے۔پی ٹی آئی نے میری23منٹ کی تقریر کے سیاق وسباق سے ہٹ کر اس میں سے ایک جملہ اٹھایا اور عمران خان کو معصوم ثابت کرنے کیلئے اسے وائرل کردیا جس میں کہا گیا تھا کہ مجھے اور میرے بھائی کو عمران خان نے نہیں جنرل باجوہ اور جسٹس ثاقب نثار نے جیل بھیجا میں نے اپنی تقریر کے آغاز میں ہی کہہ دیا تھا کہ سابق آرمی چیف جنرل قمر جاوید باجوہ اور سابق چیف جسٹس ثاقب نثار نے انہیں اور ان کے بھائی کو جیل بھجوایا تھا جب کہ بانی پی ٹی آئی عمران خان نے اس جیل کو توسیع دے کر اسے مزیدطویل تر کروایاتھا۔رہنماء ن لیگ سعد رفیق کا اپنی پوسٹ میں مزید کہنا تھا کہ ان کے خاندان کو تکلیف دینے والوں سے ذاتی رنجش تھی اور نہ ہے اور نہ ہی کوئی انتقام لینا ہے لیکن ذمہ داران میں سے کسی ایک کو مکھن سے بال کی مانند نکال کر تاریخ مسخ کرنے نہیں دی جائے گی۔انہوں نے کہا کہ جس نے جو کیا وہ اب تاریخ کا حصہ ہے۔ جرنیل ہوں، جج ہوں یا سیاستدان ہوں سب تاریخ کے کٹہرے میں کھڑے ہوں گے۔ ان کا یہ بھی کہنا ہے کہ دو روز قبل خواجہ محمد رفیق شہید کی برسی کے موقع پر کی گئی میری گفتگو شواہد اور تجربات کی روشنی میں میرے خیالات کی عکاسی کرتی ہے۔ میںاپنے ہر جملے پر آج بھی قائم ہوں اور رہوں گا۔