پنجاب میں تعلیم کی بجائے کرپشن کوفروغ دیا جارہا ہے ڈاکٹر نبیلہ طارق

لاہور(یواین این پاکستان)ممتازسیاسی وسماجی شخصیت ڈاکٹر نبیلہ طارق نے کہا ہے کہ پنجاب میں تعلیم کی بجائے کرپشن کوفروغ دیا جارہا ہے ۔رشوت وصولی کی ویڈیومنظرعام پرآنے کے باوجودرانامشہود احمدخاں سے وزرات تعلیم کاقلمدان واپس نہیں لیا گیا،الٹا موصوف کوسرکاری تقریبات میں مہمان خصوصی کی حیثیت سے مدعوکیا جاتا ہے۔ایک رشوت خوروزیرتعلیم کواپنے تعلیمی اداروں میں دیکھ کریقیناطلبہ وطالبات پربرااثر پڑتاہو گا۔نااہل حکمران ہماری طلبہ برادری کوکیا درس دے رہے ہیں ۔رشوت خوروں کواہم سرکاری عہدوں پربٹھانا قومی المیہ ہے ۔پنجاب سے بدعنوانی ختم کرنے کادعویٰ کرنیوالے رانامشہوداحمدخاں کوانصاف کے کٹہرے میں کیوں لے کرنہیں آتے ۔ بدعنوانی ایک جرم ہے ،اس کاارتکاب کرنیوالے کوسخت سے سخت سزاملنی چاہئے ۔وہ اپنے رابطہ آفس میں طالبات کے ایک وفد سے بات چیت کررہی تھیں ۔ڈاکٹرنبیلہ طارق نے مزید کہا کہ ریاست کے مفادات کسی مصلحت پسندی کے متحمل نہیں ہوسکتے ۔ہرمجرم کوسزادی جائے خواہ وہ کوئی بھی ہوورنہ قانون کی حکمرانی کاخواب چکنا چورہوجائے گا۔ انہوں نے کہا کہ نام نہادخادم پنجاب کی ناک کے نیچے کرپشن ہورہی ہے اوروہ بے بس ہیں ۔جوحکومت ایک صوبائی وزیر کوبدعنوانی کے ارتکاب پربرطرف نہیں کرسکتی اسے میرٹ اورانصاف کی دہائی دینے کاکوئی حق نہیں پہنچتا ۔