بھارت کو مذاکرات کی دعوت دی،منفی اور متکبرانہ رویے سے مایوسی ہوئی: عمران خان

اسلام آباد (یواین پی) وزیر اعظم عمران خان نے اقوام متحدہ کی جنرل اسمبلی کے اجلاس کے موقع پر طے شدہ پاک بھارت وزرائے خارجہ کی ملاقات ملتوی ہونے پر مایوسی کا اظہار کیا ہے۔وزیر اعظم عمران خان نے ٹوئٹر پر اپنے پیغام میں کہا کہ انہوں نے امن مذاکرات کی بحالی کیلئے بھارت کو دعوت دی لیکن انہوں نے اسے ٹھکرادیا، مجھے بھارت کے منفی اور متکبرانہ رویے سے مایوسی ہوئی۔ عمران خان نے مزید کہا بھارت کی جانب سے امن مذاکرات کی پیشکش ٹھکرا کر چھوٹے پن کا اظہار کیا گیا ’ میں نے ساری زندگی ایسی چھوٹے لوگوں کو دیکھا ہے جو بڑے دفاتر پر قبضہ جمائے ہوئے ہوتے ہیں لیکن ان میں وسیع پیمانے پر سوچنے اور مستقبل بینی کی صلاحیت نہیں ہوتی۔
واضح رہے کہ وزیر اعظم عمران خان نے بھارتی ہم منصب نریندرا مودی کو خط لکھ کر پاک بھارت وزرائے خارجہ کی ملاقات کی تجویز پیش کی تھی جسے قبول کرلیا گیا تھا تاہم بھارت نے جمعہ کے روز اقوام متحدہ کی جنرل اسمبلی کے اجلاس کے موقع پرشیڈول کی گئی ملاقات منسوخ کرنے کا اعلان کردیا۔ بھارت کے دفتر خارجہ کی جانب سے ملاقات کی منسوخی کے اعلان میں نہ صرف غیر سفارتی زبان استعمال کی گئی بلکہ وزیر اعظم عمران خان کے حوالے سے بھی ناشائستہ الفاظ کا استعمال کیا گیا ہے۔